Samtgemeinde Harsefeld: Gemeinde Bargstedt Platt

To de Gemeen Bargstedt hüürt dat Dörp Bargstedt mit den Ortsdeel Ohrensen. Dat gifft hier meern op ’n Rügg vun de Harsefelder Geest veel Stücken mit Wald un Holt, sünnerlich Stään mit Eickenholt un Bööken.De Böker op ’n Rothuus hebbt för de Gemeen 2.027 Inwohners tohooptellt (Stichdag: 30.06.2012). De Gemeen hett in ’n Ganzen 25,91 qkm.

Deutsche Fassung

Dat Wappen vun ’e Gemeen schall op ’n Grund een Barg vörstelln – wo Bargstedt denn natürlich ook den Nomen vun hett. De Afkooten hebbt „Bargstedt“ vun ganz ole Tieden op an jümmers mol wedder anners schreeven: Mol heet dat Dörp „Bergstede“, denn „Berckstede“, man denn opletzt „Bargstedt“, as wi dat nu kennt. De Klöör vun dat Wappen is gröön un blau. Gröön is de Foot vun dat Wappenschild mit den Barg, wo ook noch een Schwert roppmolt is. Dat Schwert liggt liek op den Barg un is sülbern. Op den Barg steiht meern in ’e Mitt’ vun dat Wappen dat Woterbecken för de Kinddööp. Gliecks dorbi un ’n beten wat hööger is een Linn’ntwieg to seihn mit dree Blöö. De Linn’ntwieg is so dacht, dat dat Dööpbecken op düsse Ort un Wies noch miehr an Bedüüden kriggt. Jüst so as dat Schwert hebbt Becken un Twieg een sülbern Klöör.
Dat Wappen vun ’e Gemeen Bargstedt gifft dat all siet 1960 un is to düsse Tied vun den Innenminister vun Neddersassen verlöövt woorn.

Liekers dat keeneen nipp un nau weet, is dor wohl vun uttogohn, dat dat Karkendörp Bargstedt entstohn is, wieldat dat hier all in ganz ole Tieden een Stää geev, wo de Minschen ehr heidnischen Feste fiert hebbt. Vun düsse Stää is loterhen denn Bargstedt vun woorn – „Haufendorf“ seggt dor de Studeerten to, un dat is so to verstohn, dat all de Hüüs op een Hümpel liggt. (Liekers mach ik dat gor nich schrieven: „Hümpeldörp“.)
So üm un bi 1200 n. Chr. geev dat Striet dorüm, wokeen vun de adligen Herrn in düsse Gegend dat Seggen hebben schull. Boot woorn is dorüm de „Ohrensburg“ an ’n Tiefenbach, man de gifft dat vundoog nich miehr. 1793 is de Kark in Bargstedt affbrennt. Mit de olen Steens vun ’e tohoopstörkte Kark hett de Gemeen bit 1801 jüm ehr Kark wedder opboot. Ut de Tied vun 1700 stammt de ole Walkmöhl bi Ohrensen, liekers is de all vun 1907 op an nich miehr to ’n Walken bruukt woorn. De Walkmöhl bi Ohrensen is nu een Stää, wo junge Lüüd un Jugendgruppen öber Nacht blieben könnt.

Dat meiste Güld waard in Bargstedt verdeent mit ’e Buree. De Burns in de Gemeen hebbt veel Ackerland, wo ook ennig wat rutholt waard, un bobento gifft dat in düsse Gegend ook allerhand Tucht- un Mastbetriebe. Fooken all hebbt Burns ut düsse Gemeen ’n Pries wunnen – vun wegen ehrn Erfolg mit de Veihtucht. Dat sünd denn ook mol Priesen ween, wo Burns ut ganz Düütschland mitmookt hebbt. In Bargstedt gifft dat ook de bekannte Deckstation för Peer (un dat is denn een Nebenstää vun dat Landesgestüt in Celle).

Sport mookt ’n in ’e Gemeen Bargstedt bi den „TUS Eiche Bargstedt“. Nich bloots Football, man ook Tennis waard hier anboden, un dor gifft dat ook extro een’ ennigen Sportplatz för.

Noch miehr Informationen to de Gemeen Bargstedt gifft dat in ’t Rothuus bi de „Bürgerinfo“.

Op Platt öbersett’ vun Thomas Stelljes