Schließen X
Bild wird geladen...

Samtgemeinde Harsefeld: Harsefeld Plattdeutsche Fassung

De Samtgemeen Harsefeld


In ’n Süden vun de Stoder Geest liggt de Samtgemeen Harsefeld. Se is grünnt woorn 1972, as dat in ganz Neddersassen de grote Verwaltungs- un Gebietsreform geev. To de Samtgemeen Harsefeld hüürt de Flecken Harsefeld un noch dree anner Gemeenden to: Ahlerstedt, Bargstedt un Brest.De Böker op ’n Rothuus hebbt för de Samtgemeen 20.281 Inwohners tohooptellt (Stichdag: 30.06.2012).
De Samtgemeen hett in ’n Ganzen 165,29 qkm.

 Deutschsprachige Fassung

Rund üm den Flecken Harsefeld un in de Gemeen Bargstedt gifft dat de typische Landschaft vun de Stoder Geest, fooken mit lütte Bargen un mit wiete Stücken Land, wo Holt op wasst. Jüst so gifft dat in düssen Deel vun ’e Samtgemeen dat Woter vun de Aue mit all ehr anverwandten lütten Beeken. Wo de Aue langslöppt, dor sünd denn to ’e Hauptsook Weiden un Wischen to finden. Wieter noh Ahlerstedt un Brest to waard de Landschaft in ’n Ganzen wat sieder. Finden kann ’n hier groote Stücken vun Gröönland un jüst so Ackerland, man jümmers gifft dat ook mol natte Moorstücken dortwüschen.

De Samtgemeen Harsefeld hett sik bit vundoog düchtig rutmookt. In ’n Rothuus weet man, dat sik in düsse Kuntrei düchtig wat beschicken lett, wieldat sik de Gemeen instellt hett op de modernen Tieden un op dat, wat hüüttodoogs för Handel un Wirtschaft nödig deiht. De Gemeen is jüst so good utstaffeert mit Inrichtungen för de Minschen, so as Schooln, Sportanlogen oder Vereenshüüs op ’n Dörp. Dat Handwark, dat Gewerbe, Büro- un Dienstleitungen, de Landwirtschaft, Hotel- un Gastwirtschaft un nicht toletzt de Lüüd vun ’t Rothuus – se all arbeit’ Hand in Hand un dat löppt good! All tosomen hebbt ’s sik vörnohmen, dat ook in Tokunft dat Thema „Leben und Arbeiten“ de wichtigste Opgoov för de Samtgemeen bedüüd un dat sünnerlich de Lebensqualität in ’e Samtgemeen Harsefeld noch wieter vöran bröcht waarn schall.

Noch miehr Informationen to de Samtgemeen Harsefeld gifft dat in ’t Rothuus bi de „Bürgerinfo“.

Op Platt öbersett’ vun Thomas Stelljes

 
 
Zur Werkzeugleiste springen