Wat würn dat noch vör´n Tieden, as de Scholmester op de Stoder Geest noch Schwien un Keih in´n Stall stohn har un de Dörpslüd sick von Fidi Döscher sein Opa de Hoor schniern leeten. Jo, Fidi´s Opa wür een Allerweltskerl. Hee schnier nich blooß den Scholmester de Hoor, ne, he bröch em ok jeden Morgen de Melkkannen, denn he führ för´t ganze Dörp de Melk no de Meieree.

 
Uns Fidi wür bannig stolz op sein Opa un höl em för klöger un starker as den Scholmester, tomol Fidi sein Opa een lange Pietsch har, de he jümmer ordich knall´n leet, wenn he bien´n Scholmester op´n Hoff ropführn dä.

Ober mit Fidi sein Schlauheit inne School wür dat nich wiet her. Eenmol ok, Fidi har sein Lesstück nich ordich öberlierd un stodder sick dor wat togang, so dat den Scholmaster dat tomutsch wür. He fackel nich lang un hol den Stock ut´n Schapp. Ober dor harn ji uns Fidi mol sehn müßt, he neih hoch, rut ut de Bank, Dör open un wech wür he.

De groten Jungs achter em her. Dat dur ok nich lang, to harn se em. In´ Hinnerk-Köter sein Wisch har he sick verkropen. Na, de groten Jungs güng´n jonu woraftig nich vorsichtig mit em üm. Se kreegen em bi Jack un Büx tofot´n un schleep´n em non´n Scholmester, de bannig inne Brass wür, so richtig tohaun wull, sprüng Fidi op em dol un beet em batz in´n Finger.

Nu würd jo passiert. Dree grote Jungs müssen den armen Fidi op´n Disch leggen, un de Scholmester leet sein ganze "Autorität" op Fidi sein Achtersen ut.- Uns Fidi glöv sick Bölken un Schreen: "Opa kummt mit de Pietsch - Opa bringt die keen Melkkannen miehr - Opa schnitt die keen Hoor miehr", kunn em ok nich helpen. Jedenfalls in´n Finger het he den Scholmester sietdem nich miehr beten.