Zeitungsutdräger hebbt dat nich jümmer eenfach. Nich blooss, dat se jeden Dag bi Wind un Wedder de Lesers dat Neeste in't Hus bring'n dot, ne, de armen Tostellers möt ok noch op de veelen Sonnerwünsche ingohn. De een will sein Zeitung `n Eck ut'n Breefkassen rutkieken loten, dormit he glieks sehn deit, dat sein Morgenlektüre ok dor is. Anner een Kund'n will sein Blatt ganz deep in'n Kassen heb'n, kunn jo klaut warn. Givt ok welke, bi de klingelt war'n schall. Un denn givt dat Lüüd, bi de mut dat Tageblatt ünner de Footmatt leggt war'n, weil dor gorkeen Breefkassen is.

Nu givt dat jo ok Minschen, de jümme Zeitung op'n "Örtchen" dörchstudiert. Is jo ok nicks bi intowen'n. Ober nu geev dor inne Stad t `n Fronsminsch, de verlang'n, dat ehr Zeitung jeden Morgen in't Klofinster rinsteeken war'n schull. Se hett ok'n groden Breefkassen. Ober för de Fro is dat man eenfacher so, se brukt man blooss, wenn se op "Tante Meyer" sitten deit, ehr rechte Hand uttstreeken, un se har ehr Zeitung. Dat hett sik siet Johr'n so inspeelt. Wenn de Zeitung mol `n halbe Stün'n loter keem, so stühr ehr dat nich. Se seet op er runne Brill un tööf so lang, bit dat se ehr Tageblatt von dat opene Finster aflang'n kun'n.

Dat hett sik ober todrog'n, dat in de Wohnbezirk von dat Wief een annern Zeitungsutdräger de Run'n möök. Uns leebe Fro set sik as jeden Morgen op ehrn "vertrauten Sitz" un tööf gedullig op ehr Stoder Blatt. Doch nicks passier. Bit halbig teihn hett se datt utholl'n. To ward ehr dat to mutsch. Beeten argerlich rööp se bie'n Verlag an un fröög, op se gorkeen Zeitung heb'n schull? De Sachbearbeiter wür jo fründlich un versprök ehr, glieks een Zeitung notolebern. As de Fohrer bi de Fro an't Hus keem, seech he, dat de Zeitung all in den Breefkassen steeken däh. Na, he klingel denn jo un seggt to de Fro: "Ich weiß gar nicht was sie wollen, Ihre Zeitung ist doch im Kasten." Dor harst de Olsch ober mol seehn müss. Se kreeg ganz glunnige Oogen un sech: "Junger Mann was heist hier Kasten! Seit Jahren bekomme ich die Zeitung durchs Fenster," un wiss op dat Klofinster, "merken Sie sich das. Man muss doch schliesslich in Ruhe was für seine Bildung tun!" Jo, geiht woll nicks öber een reelle "Klobildung".