Leebe Leser, kenns Du Plattdütschland? Jo, Dütschland, Holland un Ingland, dat kennt jederen. Ober Plattdütschland dor heß noch nicks von hürt. Oder doch? Na, ick will ihrlich wehn, bit vör een poor Johrn kunn ick dormit ook nicks mit anfan'g.

Wie, von de Wohlerster Theodorgrupp goht mit uns plattdütsch Stück aff un an op Reisen. Un so keem dat, dat wie unsen lustigen Eenakter "Tante Adelheit" ook mol bi so'n illustre Gesellschaft opführn müssen. Würn tomeist Quittjes. Wo üm dat in disse Komödie gohn dä,hebbt de Tokiekers anschiend alltohop mitkreeg'n. Se hebbt düchtig lacht un ook bannig veel klatscht. Jüm hett dat so segg'n se to uns, good gefull'n. Uns ook mit jüm.

Na, as wie dann mit uns Speel trech würn un wie uns wehr as "normole" Minschen mang de Tokiekers mischen dähn, dor keem doch son lütje Deern von neegen oder teohn Johr op mi to un frööch mit'n trohardig Lüchen inne Oogen: "Kommen Sie aus Plattdeutschland?", Jungedi, dat verslööch mi doch de Sprook. Ick heff versöcht, ehr dat to verklo'n. Ob se dat begreep'n hett dat week ick nich.

Ober ick heff dor doch öber nodacht. Un ick meen, so ganz verkiehrt wür dat nich, wat dor in ehr'n litten Breegenkassen vör sich gün: Plattdütschland! Villich hett de ohnungslose Deern gornich so Unrech.

Jo Plattdütschland, dat givt dat. Ganz deep in' Harten, wo nich blooß plattdütsch snackt ward, nee wo ook dat ole, wat uns Grotöllern uns verarvt hebbt, faß holl'n dor is Plattdütschland.