In de School kannst du bald jeden Dag wat beleben. Dor is jümer wat los. Un wenn een seggt, dor gifft dat nix as Arger, denn hett he sülbst Schuld. Worüm freit he sik nich öber de lütten Soken? Dorvon gifft dat doch genoog.

Een lüttje Geschichte fallt mi jedesmol in, wenn ik an een Gärtneree vörbikoom. Den Nomen bruuk ik jo nicht jüst to seggen, anners is Ludn mi noch böös.

Dat liggt nu al een poor Johr trüch. Ik harr in een Klass in Harsfeld Biologie un harr de Kinner wat von "Mutterboden" un "Bodenschichten" vertellt, de al sogoor in uns Harsfeld ganz verschieden wesen künnt. - De Kinner schullen nu "Bodenprofile" an verschiedene Stellen in Harsfeld moken. Un ik wies jüm, wie man dat anfangen deit: Toeerst groovst du een Lock, eenen halben Meter in'n Quadroot - un meist eenen Meter deep. De een Siet ward schöön glatt mookt. - Un denn nimmst du een Stück Tapetenrest un smeerst dat schöön dick mit Kleister in. - Un wenn du dat Papier nu an de glatte Wand von dat Lock andrücken deist, denn backt dor een Barg von de Sandköörns an fast, un du kannst achterher genau de verschiedenen Schichten von den Bodden sehn un afmeten.

Mien Schölers harrn dat begrepen un verdelen sik nomiddoogs öber de Harsfelder Feldmark, groben Löcker un möken "Bodenprofile".

Den annern Dag wiesen se jümehr Arbeiden vör, un wi vergleken de Schichten miteenanner: Op den Ehrensbarg wöör de Bodden anners as in'n Dörp, - un in'n Braken sehg dat ünner de Eerd nich so ut as blangen de Au. - Wie hüngen de Tapetenstriepen mit de Boddenschichten alltohoop an de Wand un vergleken jüm. - Een "Bodenprofil" wöör besonners goot. All de Schichten kunnst du fein sehn. Dat wöör een saubere Arbeit.

As wi noch bi'n Afmeten un Bewunnern wöörn, do sä Ludn, de Gärtnersjung, ganz dröög: "Was meinen Sie, wie ich mich beeilen musste. Die Beerdigung war schon um halb eins!"

Ik dach, ik höör nich recht un wull eerst schimpen. He sä denn ober: "Tscha, dat güng doch so veel eenfacher. Denn bruuk doch dat ole Lock nich sülbst to groben." - "Hett di denn dor ok een bi sehn?", fröög ik. - "Nee", sä he,"ik kunn dat Singen jo hören. De singt bi "Jesu-geh-voran" jümmer veer Verse. Un bi den drütten wöör ik al weg."

"Wat schaßt du dorto seggen? - In de School seggt wi dorto "Praktische Intelligenz". Op Plattdüütsch heet dat: "Musst di to hülpen weten".