Wenn de Minschen op Reisen goht, denn künnt se mehr hören un sehn as jüm dat Heimatdörp bütt. - Ok in Harsfeld hett dat jümmer Minschen geben, de geern grote Fohrten mookt hebbt. Un du wunnerst di, wat dor denn so bi rutkomen is.

Dat sünd noch keen teihn Johr her, do möök een Jung ut unser Gemeen een Reis no Thailand. Un as he wedder trüch kööm, do harr he sik verheiroodt, ober nich mit irgendeen Deern, - nee, sien Fro stammt ut een Königshuus un is een richtige Prinzessin. Se höört to de nöögste Verwandtschop von König Rama IX., Bhumibol Adulyadej, un sien Fro Sirikit. He hett ehr kennenlehrt in Hamborg op de Universität.

Wat wöörn de Zeitungen dorvon vull, as de junge Mann ut unser Gemeen een so grote Partie moken dä un nu in Bangkok wohnt un to de ganz Hoogen höört. Een Prinzessin ut Thailand, - de mit enen Jung ut de Harsfelder Gemeen verheiroodt is - un de nu sienen Nomen drüggt: Wenn dat nix is! - De Reis, de hett sik lohnt. - Dat Reisen kann ober ok een böse Last wesen. Denn büst du heelfroh, wenn du de achter di hest. - Ik denk dor an enen, de ok wat mit uns Harsfeld to doon harr. - Kaiser Heinrich IV. wöör dat. -

Junge, wat güng dat dor tomols hooch her! Heinrich kunn sik jo woll gornich mit den Papst Gregor VII. vergohn. "Investiturstrict" heten se dat. De Papst de wull ok öber den Kaiser dat Seggen hebben, - un de wull dat ümgekehrt. Dat güng hin un her. Toletzt kööm Kaiser Heinrich IV. in den Bann un müß lütt bigeben. Un denn müß he den berühmten "Gang no Canossa" moken, - 1077 wöör dat. Un in Canossa müß he vör den Papst enen Kneefall doon un üm goot Wedder anholen.

Un wat wöör dat buten för een Wedder! Midden in'n Winter un iesglatt! - Du kannst dat nich mit vondoog verglieken, wenn de Reislüüd in'n Sloopwogen no Italien föhrt - oder wenn se mit 'n "Jumbo-Jet" no Thailand fleegt. - To Foot müß de Kaiser öber de Alpen no Canossa stebeln. Foken güng dat man blooß op Hannen un Fööt bargop un bargdol. - Na, wenigstens hebbt sik de Strapazen för em politisch lohnt. Heinrich wöör sienen Bann wedder los un kunn von nu an wedder rejolich regeern. -

Ober wat hett dat mit Harsfeid to doon? - Mehr as du denkst! - Du magst dat glöben oder ok nich: Kaiser Heinrich IV. de harr sien tweete Fro von de Stoder Geest. De wohn tomols in Harsfeld. - Tscha, un dat hett nu ok wedder wat mit Reisen to doon. -

De Harsfeider Grafen, de Udonen, harrn hier tomols dat Seggen. Se wohnen in de Burg in Harsfeid. Dat is dor, wo se nu an't Buddeln un Restaureern sünd. - Heinrich III., de Lange, de Söhn von Graf Udo IV. un sien Fro Oda von Werl, de harr von 1082 bit 1087 as junge Mann dat Regeern. Sien Mudder wöör dor woll hauptsächlich achterher, dat Eupraxia sien Fro warm dä. De kööm von wiet her. Se wöör de Dochter von den russischen Grootfürsten Wesewold un wohn in Kiew.

Dat mööt se in Harsfeld jo woll weten hebben, dat de Deern in Geld swümmen dä un wat de för een Mitgift von ehren Vadder kreeg. Anners harr Oda woll nich so nohulpen, dat ehr Söhn sik de Bruut von so wiet herholen dä. -

Eupraxia möök de lange Reis mit groten Pomp un gewaltigen Opwand. Mit een grote "Kamel-Karawane" rück se an. Un wat harrn de Deerter allens to slepen! Kisten öber Kisten mit Kleder un annern Kroom, Keden, Ringen un annere Smucksoken, Brillanten un wat nich allens. - Wat hebbt de Harsfelder för Ogen mookt. Sowat harrn se in jümehr Leben noch nich sehn. -

Dat duur ober man blooß een poor Johr. Graf Heinrich de Lange leev nich ganz lang, un Eupraxia wöör al mit twintig Johr Wittfro. - Un denn hett de Kaiser Heinrich IV. ehr heiroodt.

Ob de ok woll blooß an ehr Geld dacht hett? Anners harr he ehr gewiß nich nohmen. - Dat ward verteilt, Eupraxia schall dat böös dreben hebben. Se schall een "sittenlose, verkommene Fro" wesen hebben, de veel Unheil anricht' hett. - No twee Johr is se Heinrich IV. ok al weglopen.

Oder hett he ehr bitieden op de Reis schickt, - to Foot, op 'n Kamel oder mit 'n Jumbo-Jet? - Ober den hett dat tomols jo noch nich geben.