Keeneen weet, wieveel Minschen von Friedrich Huth Godes hatt hebbt. Dat lett sik nu ok woll nich mehr seggen. Ober ik glööv, dat sünd mehr as wie dienkt.

Wenn een in Noot wöör, denn fröög he bi Friedrich Huth nich vergebens an. Un de hülp foken un geern. Ober wenn em ener utnutzen wull, denn mark he dat glieks. Son Minsch de kreeg denn woll een beten, ober meistens mit de Noricht, dat dat blooß eenmol passieren dä.

No Harsfeld schick he jedes Johr Geld för de armen Lüüd, de ohn' jümehr Schuld in Noot kommen wöörn. He leet dat ober jümmer dör den Pastoren verdelen. De kunn dat jo beter aftaxieren, wer würklich Geld nödig harr.

As he 1845 mol wedder in Düütschland un in Harsfeld wöör, do reis' he ok dör den Kreis Bremervörde. Dor wöör he wies, dat een von sien wietlöftigen Verwandten in Noot wöör wegen sien hogen Schulden. Friedrich Huth drööp sik mit em un höör sik allens genau an. Un denn betohl he op enen Slag all de Schulden. Un de Verwandte, de vörher nich mehr in un nich mehr ut wüß, de kunn nu ohne Sorgen sien Landwirtschaft beackern. Dat wöör ober nich allens. Friedrich Huth soorg ok för de Kinner. För twee Jungs harr he een grote Farm in Australien proot. Un enen Jungen nöhm he in London bi sik op, leet em een ollige Utbildung tokommen un soorg för em, as wenn't sien egen Kind wöör.

De ole Mann ut London harr dor sien Freid an, wenn he annere Minschen wat Godes doon kunn. Veel Geld hett he verschienkt. Ober de behööl ok de Öbersicht. In sien Breven kannst du lesen, dat he jümmer genau weten wull, ob de Hoff, den he schuldenfree mookt harr, ok goot beackert warm dä. He möök dat op de ganz feine Oort. Un denn geev he Rootslääg, welk Sorte Koorn woll am besten wesen schull, wie dat Land to bestellen is, wie dat to moken is, dat dat Unkruut keen Öberhand nimmt, wie de Kinner to Ordnung un Arbeit anholen warm mööt', wie dat Geld antoleggen is, wat to doon is bi alle möglichen Krankheiten. He kümmer sik üm allens un meen dat mit jüm man eenmol goot.

He leet de Lüüd ober ok weten, dat he blooß hülpen kann, solang he sülbst an' Leben wöör. Achterher kunn sien Familje dormit nich mehr belast' warrn. Ober allens, wat he an Hülp toseggt un in' Gang sett' harr, dat schull ok no sienen Dood noch erledigt warrn. Dat hett he vörher allens fastschrieben loten.

Friedrich Huth is as Kind wies worrn, wat dat heet, arm to wesen. He hett dom noher - in sien Öller - niemols von snackt, wie weh dat deit. Ober he bett hannelt un Godes doon. An'n 14. Januor 1864 is he in London storben.