Friedrich Huth, - so hett düsse Jung heten. Un he is in Harsfeld opwussen. An'n 29. Oktober 1777 is he in Stood to Welt kommen. Sien Vadder, - Johann Friedrich Gabriel Huth ut Strelitz, - de wöör dor tomols bi de Suldoten. Sien Mudder wöör Marie Amalie Huth. Fröher hett se Thee mit Tonomen heten. Se stamm ut Sittens. Friedrich harr noch twee Geschwister: enen Broder Konrad Georg Carl, de von 1775 bit 1828 leevt hett, un een Swester Anna Margarethe, de 1781 born is. De beiden hebbt noher in Hamborg wohnt.

As Friedrich Huth man eben op de Welt wöör, do tögen de Öllern mit de Kinner no Harsfeld. De Vadder verdeen dat Geld för de Familje mit Sniedern. He kann dorbi nich ganz veel verdeent hebben, un wi künnt uns goot vörstellen, wie schraag dat bi jüm togohn is. Veel leisten kunnen se sik nich. - Wohnt hebbt se in de Herrenstroot. Dat mutt dicht bi de Wotermöhl wesen hebben.

Dat Schoolhuus stünn tomols dicht bi de Kark, dor, wo nu de Uhrmoker v. Hein sienen Huusgorden hett. Dat geev man enen Schoolmester, un in´n Winter kööm noch een to Uthülp dorto, de ober egenlich gorkeen Schoolmester liert harr.

Ganz veel kunnen se de Kinner to de Tiet nich bibringen. Jedenfalls - dat duur nich ganz lang, do wüß de lütt Friedrich Huth mehr as de Schoolmesters. He wöör fliedig un akroot. Dat mark denn ok de Generalsupcrintendent Pratje, as he moleens in Harsfeld visitieren dä. He soorg dorför, dat Friedrich no de Schooltiet een ollige Lehrstell in Hamborg kreeg.

Un so kööm de Jung ut dat lütje Dörp in de grote Stadt un lier in den Im- und Exportbetrieb von den Spanier Urbieta een ganz annert Leben kennen. Öberall wöör dat interessant, un öberall kunn he wat tolieren. Un dat dä he. Dat mark ok sien Chef, dat he sik op Friedrich Huth verloten kunn. He schick em no de Lehrtiet no Spanien in de Stadt La Corunna, wo dat Stammhuus wöör. Hier kunn sik de junge Mann wieder hocharbeiden. He harr dor all bald veel to seggen un to verantworden. He güng jümmer op Nummer-Sicher: Toeerst mutt de Finanzierung stimmen, un dat Geld mutt dor wesen. Denn eerst kannst du een Geschäft afsluten.

So hett he dat in sien Leben mookt, - bit ton Schluß. Un sien Bookführung de wöör jümmer so, dat dor jedereen rinkieken kunn. För Heemlichkeiten wöör he nich. Dat wüssen all sien Geschäftspartner. Weil he open, ehrlich un toverlässig wöör, - ober ok genau dorbi, - dorüm hanneln se geern mit em. Op düsse Oort kööm Friedrich Huth to Ansehn un Geld. Ut den armen Sniedersjung ut Harsfeld wöör mit de Tiet een rieken Mann worrn.