To den Flecken Harsefeld hüürt de Ortsdeele Griemshorst, Hollenbeck. Issendorf, Ruschwedel, Weißenfelde un natürlich ook Harsefeld as de gröötste Deel vun den Flecken. In ’t Rothuus vun Harsefeld find’t sik ook de Verwaltung vun de Samtgemeen Harsefeld. De Böker op ’n Rothuus hebbt för den Flecken 12.378 Inwohners tohooptellt (Stichdag: 30.06.2011). De Flecken hett in ’n Ganzen 52,37 qkm.

 Deutschsprachige Fassung

Dat Wappen vun den Flecken Harsefeld wiest een Ritter, ganz in Swatt op een swatt Peerd, man dat Peergeschirr is mit Goldfaarv opmolt. Peerd un Rieder springt noh links weg. Dat Wappen is in ’e Mitt witt un hett boben un ünnen een dicken blauen Striepen affkreegen. Op dat Blaue find’t sik ünnen twee un boben dree Rosen ut Gold. De Flecken hett dat Wappen vun dat ole Amt Harsefeld öbernohmen, wat in fröher Tieden grünnt woorn is op dat Land vun dat Kloster Harsefeld.
De Grafen vun Harsefeld harrn dat Kloster vör bald dusend Johr inricht. Dor waard segg, Harsefeld sien Wappen kann snacken un vertelln – un dat kummt so: De een Deel vun den Flecken sien Nom („Harse“) hett mit dat Ingelsche to doon, wieldat „Peerd“ (wat in ’t Hochdüütsche ja ook „Ross“ heet) in ’t Ingelsche dat „horse“ is. Een anner Bedüüden find’t sik ook noch mit de Rose, also mit een Bloom’n – wenn een dat also nich glööven will, dat in Harsefeld mit dat „Ross“ wohrhaftig een Peerd meent is. Dennso schall een beter an Rosen dinken (un Rosen sünd ja ook in Harsefeld sien Wappen mit in).
An ’n 09.07.1948 hett dat een Erlass geben vun den Innenminister vun Neddersassen, wo insteiht, dat de Gemeen Harsefeld een blau-witt-klöörte Fohn hebben dröff mit jüst dütt Wappen dor op. 

De Studeerten sünd sik dor bi eenig, dat Dörper mit den Nom „-feld“ wohl to de ölsten Stään hüürt, wo Minschen in fröher Tieden wohnt hebbt. Jüst so goht se dorvun ut, dat „Harse“ tämlich dull verwandt is mit dat sächsisch-ingelsche „horse“ (wat also „Peerd“ heet), un de Nom „Harsefeld“ schall dorüm wohl ook so veel as „Peerweid“ bedüüden. Man nich bloots vun wegen den Nom kann ’n bi Harsefeld op een lange Geschicht trüggkieken. Archäologen hebbt mit Fundstücken ut een Königsgraff un ut een grooten Urnenkarkhoff (üm 400 v. Chr.) nohwiest, dat dat hier all in ganz ole Tieden lütte Hüüs un Hütten geben hett. Ole Graffstään so as de Hügelgräber könnt een Henwies ween, wat ook in den Ortsdeel Issendorf all vör veele hundert Johrn Minschen leevt hebbt.
Wat de Geschicht vun de Ortsdeele Hollenbeck un Ruschwedel angeiht, so lett sik düsse bit in dat 17. Jahrhundert trüggverfolgen.

Liekers sünd de Reste vun dat ole Kloster Harsefeld dat beste Tüüchnis vun Harsefeld sien Vergangenheit, de miehr as 1000 Johr utmooken deiht. Dat hett in Harsefeld een Benediktiner-Kloster geben un vördem ook all een Burg, de de Harsefelder Grafen tohüürn dää. Vun 1981 op an sünd Reste vun de olen Klostermüürn saneert un neiht opboot woorn. Dor, wo dat Kloster vör öber 500 Johrn mol stohn hett, dor gifft dat vundoog den Amtshof, dat MuseumHarsefeld Museum Harsefeld un de St.-Marien- un Bartholomäi-Kark mit dat Woterbecken för de Kinddööp, dat all ut dat 15. Jahrhundert stammen deiht.
De groote Amtshof is 1742 boot woorn, dor, wo in ’e Grund noch de olen Steen vun de Benediktiner-Abtei seeten hebbt. All vun de Renovierung op an is siet 1980 in den Amtshof de Friedrich-Huth-Bökerstuuv  ünnerbrocht. De Bökerstuuv tosomen mit den „Klosterkeller“ – dat is een Gaststuuv – sünd meern in Harsefeld to een Stää woorn, wo de Minschen tohoop kommen könnt. Man dat nich bloots to ’n Eten un Drinken! To de Hauptsook is dat ole Kloster een Stää för de Kultur. Mennigmol gifft dat hier in ’n Sommer Musik to hüürn, hier waard ut Böker vörleest oder dor is alle Vierdeljohr een grooten Hökermarkt.

1986 is dat MuseumHarsefeld grünnt woorn. Ünnerbrocht is dat in dat ole Gerichtshuus ut de Tied vun dat Amt Harsefeld. Mit bannig veel Leev un Interesse sünd de Utstellungsstücke herricht’ woorn – un also för de Minschen, de to Besöök noh dat Museum henkommt, wunnerbor antokieken! Dat gifft in dat Museum Sooken un Fundstücke nich bloots ut de Klostertied: Ook ut de ganz ole Tied un jüst so ut de Moderne find’t sik hier jümmers wat.
Bobento gifft dat in Harsefeld een Handfull Fronsmischen, de in ole Trachten dör den Klosterpark loopt un hier den Besöök allns verklort. Dat mookt se ook för den ganzen Flecken un ook för all de annern Dörper vun de Samtgemeen Harsefeld. De Fronsminschen liekers, de nöömt sik dennso de „Harsefelder Gästeführerinnen“.

Wenn ook de Landwirtschaft un Buree ründ üm den Flecken Harsefeld een wichtige Rull speelt, so is doch düsse Bedüüden vun ’e Buree in Harsefeld sülbst nich miehr to kennen. Hier geev dat all üm 1900 rüm veel Betriebe mit Handwark, so to ’n Bispeel een Teigelee un een Tonwark. Vundoog find’t sik hier jümmers noch allerhand Handwark un Gewerbe, un de Betriebe stellt ook ennig wat op ’e Been: Bit hen noh de Hambörger Gegend find’t se ehr Kunden. För noch miehr Ünnernehmen hett de Gemeen een grootet Stück Land treggmookt, wo ’n also mit sien Firma hengohn un sien Betrieb inrichten kann.
Dat „Raumordnungsprogramm“ för de Region üm Stood segg, dat de Flecken Harsefeld sowat as een „Grundzentrum“ vörstelln schall. För so een „Grundzentrum“ geiht dat dor üm, dat hier nich bloots g’noog Hüüs un Wohnungen boot waard, man dat dat ook Arbeit för de Minschen in jüm ehr eegen Gemeen geben deiht. För düsse beiden Themen „Arbeit“ un „Wohnen“, dor schall de Gemeen in ehre Plonung ook in Tokunft för oppassen.

Wat de Schooln angeiht, so gifft dat in Harsefeld nu sogor ook een Oberschool. 2009 waard de iersten Schölers in dat niege Gymnasium in Harsefeld dat Abitur bestohn.

Ook för den Sport un för de Freetied gifft dat ’n ganzen Barg in Harsefeld: Dor is eenmol dat „Waldstadion“ mit gliecks twee Footballfelder, dat Freebad (wo dat to ’n Glück ook warm Woter in geben deiht), denn de Eissporthalle, de Campingplatz, een Sport- und Freizeitpark mit ’n groote Tennishall’, Squash-Speelplätze un denn ook noch wat för de Fitness, nich to vergeten een Riethall’, een Padd för „Trimm-Dich“, een Padd as „Waldlehrpfad“, un opletzt denn ook noch een groote Parkanloog mit Fisch- un Oontensöll. Jüst so waard vun den Sportvereen, den Schützenvereen, vun ’e Füürwehr oder vun den Gesangsvereen allerhand Sooken to ’n Mitmooken anboden.
Wat Besünners is to ’n Bispeel de Scheitplatz vun den Schützenvereen, wo sik anner Vereene ut Norddüütschland wiss een Vörbild an nehmen könnt. De Schützenvereen vun 1903 hett düssen Scheitplatz inricht’.

De Flecken Harsefeld hett een Gemeen in Frankriech as Partner un Fründ, un dat is de Gemeen Asfeld.

Bobento is ook de Stadt Feldberg in Mecklenburg-Vörpommern een Partnerstadt vun Harsefeld.

Noch miehr Informationen to den Flecken Harsefeld gifft dat in ’t Rothuus bi de „Bürgerinfo“.

Op Platt öbersett’ vun Thomas Stelljes

 Tipp: Wi Snackt Platt in der Samtgemeinde Harsefeld