De gröötste Gemeen mang de veer enkelten Deele vun de Samtgemeen Harsefeld is de Gemeen Ahlerstedt. Düsse Gemeen gifft dat siet 1972. Tosomenslooten sünd hier de Dörper Ahlerstedt, Ahrensmoor, Ahrenswohlde, Bokel, Kakerbeck, Oersdorf, Ottendorf un Wangersen. De Gemeen Ahlerstedt is dat Haupt vun de Börde Ahlerstedt un ook vun dat Karkenspeel.. De Böker op ’n Rothuus hebbt för de Gemeen 5.050 Inwohners tohooptellt (Stichdag: 30.06.2011). De Gemeen hett in ’n Ganzen 62,43 qkm.

 Deutschsprachige Fassung 

Op dat Wappen vun de Gemeen is vun links ünnen noh rechts boben een Balken to seihn, de mit sien Wellenform dat Schild in twee Deele opdeelt. Boben links kann ’n een Huus ut ganz ole Tieden bekieken, wat keen Müürn, man bloots een Dack hett. In so ’ne Ort „Ierdhüüs“ hebbt de Minschen vör veele hunnert Johrn noch in leevt. Ünnen rechts op dat Wappen gifft dat ’n olen Backoven, de jüst so as de Balken un dat Huus een sülbern Klöör affkreegen hett. De Luuk vun den Backoven steiht open, so dat ’n acht Flammen gewohr waard, de ut dat Füür rutspeet (un de schöllt dennso de acht enkelten Dörper vun de Gemeen Ahlerstedt vörstelln).
Beidet, dat „Ierdhuus“ jüst so as de Backoven, stammt ut ’e ganz ole Tied un hett dat in düsse Gegend ook wohrhaftig geben. Dat Huus is op ’n Stück Land bi Kakerbeck funden woorn; Reste vun den Backoven hebbt ’s bi Ahlerstedt ut ’e Ier rutgroovt.

De ierste Kark is all 1656 in Ahlerstedt opboot woorn. De Kark, so as se dat nu geben deiht, stammt ut dat Johr 1865. De iersten Hütten un Katen hett dat wohl üm 970 in de Gegend vun Kakerbeck geben. Man ook in Ottendorf un Wangersen sünd noch Spuren ut ’e ganz ole Tied to finden. De Dörper Ahrensmoor, Ahrenswohlde, Bokel un Oersdorf loot sik in de Tied vun 1500 bit 1700 trüggverfolgen.

In de Gegend rund üm Ahlerstedt sünd Landwirtschaft un Buree bit vundoog de wichtigste Stütt vun de Wirtschaft, denn in ’e Buree verdeent hier de meisten Lüüd ehr Güld. Man jüst so as de Landwirtschaft hett sik ook dat Handwark in de letzten sösstig Johrn düchtig rutmookt. Man liekers sünd nich för all’ Minschen g’noog Arbeitsplätze in un üm Ahlerstedt to finden, un so mookt sik veele Lüüd op ’n Weg noh Stood, Buxthuud oder sogor noh Hamborg hen, dat se dor ehr Arbeit find’t un Güld verdeen’ könnt.

Noh dat „Raumordnungsprogramm“ is för de Gemeen Ahlerstedt vörseihn, dat sik de Gemeen hier to ’e Hauptsook üm dat „Wohnen“ kümmern schall. Jüst dorüm gifft dat in Ahlerstedt nich bloots een Grundschool, ook dat groote Schoolzentrum mit de „Schule am Auetal“ gifft dat hier, dat is een Volksschool un een Middelschool, wo dennso de „Sekundarstufe I“ inricht is.

Wat den Sport un de free’ Tied angeiht, dor hett de Gemeen ’n ganzen Barg för de Minschen doon: Dat gifft Sportplätze, man ook een Hallenschwimmbad, wat good annohmen waard. Een wichtige Rull för dat Tosomenleben vun de Minschen un för de Kultur speelt sünnerlich de Vereene, de dat in elkeen Dörp geben deiht. In den Sportvereen, den Schützenvereen, bi de Füürwehr un jüst so bi de enkelten Theotergruppen droopt sik de Minschen un stellt tohoop wat op ’e Been. To ’n Bispeel sünd jüst dorüm in Ahrensmoor un in Wangersen smucke Heimathüüs wedder opboot woorn – Hüüs, wo sik de Dörpslüüd un Vereensminschen droopen könnt – un tosomen ook fiern schöllt. Wat ganz Besünners för de Region is nich toletzt noch de Karnevalclub Ahlerstedt, de elkeen Johr to sien Faschingsfiern un anner Feste inloden deiht..

Noch miehr Informationen to de Gemeen Ahlerstedt gifft dat in ’t Rothuus bi de „Bürgerinfo“.

Op Platt öbersett’ vun Thomas Stelljes

 Tipp: Wi Snackt Platt in der Samtgemeinde Harsefeld